ಎಂಥಾ ಪುಣ್ಯವೇ ಗೋಪಿ

ಎಂಥಾ ಪುಣ್ಯವೇ ಗೋಪಿ ಎಂಥಾ ಭಾಗ್ಯವೆ ನಿನ್ನ 

ಇಂಥಾ ಮಗನ ಕಾಣೆವೆ 

ಚಿಂತಿಸಿದರು ದೊರಕ ಚೆಲುವ ರಾಜಗೋಪಾಲ 

ಚಿಂತೆಯಲ್ಲವು ಪೋಪುದೇ ಕೇಳೆ ಯಶೋದೆ 

ಸರಸಿಜನಾಭನ ಸುಮ್ಮನೆ ಕಂಡರೆ 

ದುರಿತವೆಲ್ಲವು ಪೋಪುದೇ

ಸರಸವಾಡುತ ಬಂದು ಸವಿ ಮಾತನಾಡಿದರೆ 

ಹರುಷ ಕೈಗೂಡುವುದೇ ಕೇಳೆ ಯಶೋದೆ 

ಊರೊಳಗೆ ಇವ ನೆರೆಹೊರೆಯರಂಜಿಕೆ 

ದೂರಿಕೊಂಬುವರಲ್ಲವೆ 

ಅರಣ್ಯದಲಿ ನಾವು ಆಡುವ ಆಟಗಳು 

ಆರಿಗಾದರು ಉಂಟೇನೆ ಕೇಳೆ ಯಶೋದೆ 

ನಿನ್ನ ಮಗನ ಕರೆಯೆ ಎಮ್ಮ ಪ್ರಾಣದ ದೊರೆಯ 

ಘನ್ನನು ಪರಬ್ರಹ್ಮನೆ 

ಚನ್ನ ಶ್ರೀ ಪುರಂದರವಿಟ್ಠಲರಾಯನ 

ನಿನ್ನಾಣೆ ಬಿಡಲಾರೆವೇ ಕೇಳೆ ಯಶೋದೆ